يلاَّلِي مَذَ قل أطار == من البَرْكَه والنّزاها( شعر )


جديد الشاب الاديب حمنين اسويدي في مدح شيخنا اعل الشيخ ولد امم رحمه الله :

الحمد الله القهار == ألي وحدو فيدو لعمار

القدير النافع والظار == خلق ذي لرض وهناها

بالجبال، ونبت لشجار == والسبع الطباق ابناها

ومخلق لعبيد الجبار == غير أعبيدو ماسواها

أختار- ؤذ مافيه انكار == فات الرسله واصطفاها

ومن الرسله لختار اختار == طاها، ماسواه امعاها

ومافيه شد اخبار أخيار == ذرية طاها وساها

وأنت مافيه شد اخبار == قطعا من ذرية طاها

يعلشيخ الغوث المدرار == يلي بمثالك يوباها

يلي يعطيك افذيك الدار == الكست الرحمه تلكاها

يلالي مذ قل أطار == من البركه والنزاها

يعمامة لولية لبرار == يكبير العلمه واتقاها

وارفعها واكبرها مقدار == واكبر جاه ؤوجاها

واسخاها- واسو ذ تكرار == أنت هو بعد اسخاها

يبحر الجود ويحمار == خيمة لمروة واكفاها

يلي شور الحسنه بكار == وأحمد للديد ؤوجاها

كنت، ويصيفاط الخطار == بخيار ايبالك واعلاها

تيمركاتن واخلف واعشار == وايمليان ألي بذراها

ولكباش افحولتهم لكبار == والخرفان البيظ اكلاها

يلي لفظك ماكط امرار == مبعدها فيك ومكساها

وان يخيار ألي ينزار == زيارة عاطيها ماها-

زايركم لصلاح الدارين == عند الله الثنتين إلين

فصلاح الدارين الثنتين == ننكع واندور النباها

والنزاها يجمع لي بين == النباها والنزاها

ملان، وانعيش اعل زين == حالة عيشة نتمناها

راص اركاج انعود وعين == والناس انعود اسفتاها

ؤلافي حد ايسال الدين == مانجبر شر ولاعاها

ويكفيني باس العين العين == ترجع هك اعل مولاها

لاتلكاني نكبه فمنين == زاد انموت ولانلكاها

ويحفظ لي ذوك الوالدين == الهومه بالحفظ اولاها

ؤلاشافت فيهم فر العين == فالدنيا ماهو موناها

ؤراني دوعتك يلي == فالولايه ماتضاها

واعل طاها زاد امصلي == وامسلم زاد اعل طاها

اترك تعليقاً

زر الذهاب إلى الأعلى